Polls
Announcements

Berita

JPB Sri Aman udah nagang pemindah peranak rumah panjai Sg. Putong enggau Rh Bui Panjai
Tarikh : 08 Jan 2021  Sumber Berita: Utusan Borneo Online
 

 Uggah disempulang Dr Sim (kiba) enggau Dr Chin ba aum pengarang berita madah atur 'lockdown' dipejalaika ba rumah panjai Sg. Putong, Ulu Undop enggau Rh. Bui Panjai, Lubok Antu di Pelilih Menua Sri Aman, kemari.

BEJALAIKA TANGGUNGPENGAWA: Uggah disempulang Dr Sim (kiba) enggau Dr Chin ba aum pengarang berita madah atur 'lockdown' dipejalaika ba rumah panjai Sg. Putong, Ulu Undop enggau Rh. Bui Panjai, Lubok Antu di Pelilih Menua Sri Aman, kemari.

KUCHING: Komiti Mutarka Penusah Ngenyit (JPB) Bagi Menua Sri Aman udah bejalaika 'lockdown' tauka nagang pemindah ba rumah panjai Sg. Putong, Ulu Undop enggau Rh. Bui Panjai, Lubok Antu di Pelilih Menua Sri Aman.

Sapit Kepala Menteri Datuk Amar Douglas Uggah Embas madahka nya berindik ari bisi kes positif COVID-19.

Berindik ari bisi kes positif diripotka ari rumah panjai Sg. Putong, Ulu Undop, Komiti Mutarka Penusah Ngenyit Bagi Menua Sri Aman udah bejalaika Pengawa Nyidi Kes Aktif (ACD) iya nya nganjung ejensi penerit adat bejaga ba rumah panjai nya ngambika peranak enda mindah pansut enggau orang luar enda tam ke rumah panjai nya.

"Komiti Mutarka Penusah Ngenyit Bagi Menua Sri Aman udah ngena 'lockdown' ba rumah panjai Sg. Putong, Ulu Undop enggau Rh. Bui Panjai, Lubok Antu

'Lock down' tu reti iya kitai nentuka iya nya nadai peranak rumah panjai dikemendarka pansut ari rumah.

"Lebuh kitai bejalaika 'lockdown' tu semua opis baka Polis Diraja Malaysia (PDRM) enggau Opis Pengelantang Pendiau Komuniti (JKM) sama datai mantu, laban orang rumah panjai enda ulih pansut bebelika barang pemakai , nya alai sida JKM deka nentu sereta mekalka pemakai ngagai peranak ba kededua rumah panjai tu," ku iya.

Uggah ti mega Chairman Mutarka Penusah Ngenyit Nengeri Sarawak (JPBNS) mansutka pekara nya ba aum pengarang berita COVID-19 Sarawak ti diatur ba Bengunan DUN Lama ditu, kemari.

Lebuh ti ngenang kes positif COVID-19 nya, Uggah madahka, kes ke ditemu ba Pelilih Menua Sri Aman iya nya kes 1,117 (kes positif COVID-19 baru kemari) siku peranak menua beumur 86 taun asal ari rumah panjai Rh Sg. Putong, Ulu Undop ti udah berubat ke diri empu ke klinik sri aman sereta ditemu positif kena 6 Januari.

Nambahka nya iya madah Kes 1,180 iya nya baru ditemu baru kemari ba Pelilih Menua Sri Aman bekaul enggau siku Pembantu Awam beumur 36 taun peranak Sarawak ti ditemu positif COVID-19 kena 6 Januari 2021.

Nitihku iya Kes 1,180 iya nya asal ari rumah di Klauh, Sri Aman.

"Kededua kes (1,177 enggau 1,180)  tu ke sepital laban bisi tanda tabin enggau batuk.

"ungkup kes 1,180 tadi Komiti Mutarka Penusah Ngenyit Bagi Menua Sri Aman mega bejalaika ACD ba Klauh enggau ba Kampung teratai, mega ba Sri Aman, laban kes ditemu bisi ngelawa endur nya maya Hari krismas," ku iya.

Berindik ari pekara nya, kemari Pelilih Menua Sri Aman udah betukar status ari Gadung ngagai status Kuning pengudah dua kes positif ti berampit dalam pelilih menua tu.