Sarawak ID | Register
Polls
Announcements

Berita

Peminta nguna Kiosk Dagang Nembiak di Sri Aman dibuka nyentuk 24 March tu
Tarikh : 19 Mar 2022  Sumber Berita: Suara Sarawak
 

Harden (lima kiba) begambar enggau bala ti bisi datai ba mua sebuah Kiosk Dagang Nembiak ditu, ensana.

SRI AMAN: Projek Kiosk Dagang Nembiak dikeandal deka meri peluang ngagai raban nembiak di genturung Sri Aman ngaul diri dalam dunya dagang mit ti lebih menyana.

Sapit Menteri Pelajar, Inovasyen Enggau Pemansang Penau ll ti mega Adun Simanggang Datuk Francis Harden Hollis madahka kiosk dagang nya ngembuan tujuh langkau mit kiosk ke alai sebuah kiosk tu digaga enggau ungkus belanja RM21,000.

“Ku penerang ejensi pejalai projek Kaunsil Kandang Menua Sri Aman (MDSA) pengawa ngaga kiosk tu berengkah kena 16 Ogos 2021 lalu tembu kena 27 November 2021.

“Raban nembiak ti bisi ati deka bedagang ba kiosk tu tau ngaga peminta ngagai MDSA diatu laban peminta deka ditutup kena 24 March tu ila,” ku iya.

Harden bejaku munyi nya rambau bejadika Kiosk Dagang Nembiak ditu, ensana.

Tandu iya, kriteria enggau syarat ti patut dititihka raban peminta deka diperunding kaban kaunsil sebedau ngeluarka lisin bedagang ba kiosk nya.

“Aku mega meri pengaga ati ngagai raban MDSA kelebih agi Tuai Opis Kaunsil Kandang Menua Anthony Abell enggau Sekretari MDSA Tay Guan Huat laban udah mujur nyendiaka Kiosk Dagang Nembiak awakka bala nembiak ulih ngulihka penatai ekonomi lalu ngemanahka tikas pengidup sida,” ku iya.

Sama bisi datai Pemesai Pelilih Menua Sri Aman Mohd Ashree Wee, Temenggong Kueh Aik Seng enggau ke bukai.